Wednesday, May 02, 2007

六合彩,七千萬!

合彩吃白果也高興,事關幾千萬的頭獎仍然懸空。坊間流行的半杯水哲理,什麼半杯空半杯滿,皆一派胡言。試問中三個字或欠三個字又有何分別?水杯半空半滿都不相干,重點在於水是否清甜解渴。擁得李嘉誠的一半身家,你還會諸多事幹什麼半空半滿嗎?

上期一注獨得金多寶的美夢碎了,但不要緊。我們得個吉時,其他人也陪著我們運吉,這才是最令人振奮的哲理。自己的水杯空空如也,當然祈求別人也無啖好飲啦。又如GiGi被伊麵拋棄,她跌落地執件法國佬只代表她好勝,而最令她心涼則還是伊麵受騙於老千YoYo。

六合彩著實有不少奇怪的理論,譬如聽人說過:「買則有一半機會中,不買則一點機會也沒有。」是否似曾相識?求學時玩暗戀,同學們總會鼓勵說:「表白則有一半機會成功,放棄則必定失敗。」但想深一層,難道欣宜向你投懷送抱,她就有50%機會征服你?換上郭羨妮的機會率又如何呀?

不要笑人,也不要以為投注六合彩是一門簡單的學問。明天星期四[03/05/07]金多寶七千萬巨池,你打算訓身多少?

一張電腦票?數十注自選?抑或什麼復式膽拖?

對呀,買得多,中的成數越大。買兩注就比一注多100%機會。但又有誰想過,中頭獎的機會率約一千萬份之一,算你買一百注,也只不過是一千萬份之一百。買得多,妄圖藉著提升機會率而中頭獎,可謂擔沙填海,情況與跟欣宜談戀愛差不多。你又或者純粹出於慣性只買一張電腦票或自選四注,這則反映你一直麻木地活在別人支配的世界,某程度斷送了自我作主的話事權。乃因還原基本步,中頭獎全憑運氣。既然是運氣,買一注五元就夠,對嗎?

我期望明天中頭獎,因為我對神承諾過,如果明天我一注獨得七千萬的話,哇哈哈,我會第一時間向妳示愛。

11 comments:

新鮮人 said...

嘩~~~你講到咁,
積係叫人唔好同你爭啫,
如果唔係你將來溝到女就要我哋負全責?

我都係生活在貧窮線下啊,
一人一半,三千萬好唔好呀? :p

HanaMaru said...

有個朋友期期都買一元美金。朋友說“係你既就係你既,就算係一元都可以中!唔係你既你買幾多都無用。”

嬲記三文治 said...

"明天中頭獎...我會第一時間向妳示愛"

果然是:

"塵世間最偉大的愛,莫過於找到條大水喉"

eyer said...

鮮, 獨中既話畀晒d錢你都無所謂,我至在羅個采 =□=

hana, 外國lottery未買個,唔知基本派彩係點。不過香港馬會抽水好深,基本派彩得5百萬。Statistically speaking, 係香港期期買一注都好老襯。

嬲, 搵到條大水喉固然偉大。自己大把水射人更不得了!

冬冬 said...

梗係香港中六合彩好啦﹐唔駛比稅喎﹐係美國中左六合彩﹐扣左稅後有四分一到手都已經偷笑。

Je t'aime said...

有人計過中六合彩的機會率真係低到10萬份之一咁濟,所以唔中可以當做善事既

winking said...

我頭先lunch去同普羅大眾一起排隊買六合彩,見倒有個男人拎住部高性能相機係咁影,當下都好想反影佢...

香港地千奇百怪現象有好多,大家都係投機心態,妄想一朝發達,從此改寫命運...

我間中會買吓,但絕大部份情況係買完就算,可能曾經中過獎都未定喇~

買彩票,不過係買個希望,廿蚊買個希望,很划算...

好過掟錢落海啦,掟錢落海註定冇,仲要污染海港...  

eyer said...

冬冬, 大話怕計數,美國大州lotto的jackpot億億聲(兌港元),七除八扣後都應該多過六合彩果區區幾千萬。仲有,香港政府都有抽六合彩稅,不過係派彩前已經扣起。

moi aussi, 關於善事,1注$5,其中$2.7入彩池、$1.25博彩稅,$0.3馬會佣金,剩底$0.75先捐出去。捐到出去,慈善團體又會再減除一些行政費用,實質做善事可能不到5毫子。你係咪有睇張五常,佢係關於褔利及慈善的文章都有提及類似的情況。

姑姑, 買希望5蚊就夠,但點解大部份人唔買10蚊或30蚊,而買20蚊。因為玩下手段,改變下彩票既設計,香港人都可以好慷慨。是的,貼仔跟掟錢落海一樣,無回報的,經一事長一智啦 O_o

冬冬 said...

jackpot真係呢邊大D﹐不過呢邊既仲難中過香港﹐要中晒五個#+特別號碼先得。而個特別號碼係可以同普通#重複先攞命~~
(例﹕ 1﹐2﹐3﹐4﹐5 特別號碼﹕5)

winking said...

哇,EyEr叔,乜你講到我好似貼過仔咁嫁~

and,你示了愛沒有?我八卦...wakakakaka

eyer said...

冬, 唉..香港易中又唔見我中:(

姑, 見財化水啦,仲示乜鬼丫。惟有等待神既再次按排啦。